dilbar nahin habib nahin pasban nahin

dilbar nahīñ habīb nahīñ pāsbāñ nahīñ

maiñ vo zamīñ huuñ jis kā koī āsmāñ nahīñ

jo dard de na jaa.e vo āh-o-fuġhāñ nahīñ

jo le na jaa.e naama vo nāma-rasāñ nahīñ

muddat se huuñ paḌā huā tarkash kī qaid meñ

maiñ tiir huuñ mire liye koī kamāñ nahīñ

us kī samajh meñ aa ga.e hālāt ke nuqūsh

vo bad-gumāñ to thā magar ab bad-gumāñ nahīñ

vo muskurā ke chaḌh gayā neze kī nok par

vo shādmāñ thā phir bhī sitam shādmāñ nahīñ

is darja hai lihāz ki khultī zabāñ nahīñ

ham kyā batā.eñ dard kahāñ hai kahāñ nahīñ

bosa bhī duuñ to kis pe duuñ ai jān-e-jāñ batā

sahrā meñ tere paañv kā koī nishāñ nahīñ

lab tere pankhuḌī tire ruḳhsār haiñ gulāb

ham samjhe is zamīñ pe koī gulsitāñ nahīñ

maiñ tere sāmne huuñ tū hai mere sāmne

ab to koī lakīr yahāñ darmiyāñ nahīñ

kahnā ho jab sharāb use to kahe sarāb

ab mai-kade kā saaqī bhī ahl-e-zabāñ nahīñ

dilbar nahin habib nahin pasban nahin

main wo zamin hun jis ka koi aasman nahin

jo dard de na jae wo aah-o-fughan nahin

jo le na jae nama wo nama-rasan nahin

muddat se hun paDa hua tarkash ki qaid mein

main tir hun mere liye koi kaman nahin

us ki samajh mein aa gae haalat ke nuqush

wo bad-guman to tha magar ab bad-guman nahin

wo muskura ke chaDh gaya neze ki nok par

wo shadman tha phir bhi sitam shadman nahin

is darja hai lihaz ki khulti zaban nahin

hum kya bataen dard kahan hai kahan nahin

bosa bhi dun to kis pe dun ai jaan-e-jaan bata

sahra mein tere panw ka koi nishan nahin

lab tere pankhuDi tere ruKHsar hain gulab

hum samjhe is zamin pe koi gulsitan nahin

main tere samne hun tu hai mere samne

ab to koi lakir yahan darmiyan nahin

kahna ho jab sharab use to kahe sarab

ab mai-kade ka saqi bhi ahl-e-zaban nahin