dilkash gurez-pa shab-e-mahtab ki tarah

dilkash gurez-pā shab-e-mahtāb kī tarah

ye zindagī hai ek hasīñ ḳhvāb kī tarah

saaqī tire karam tirī dariyā-dilī kī ḳhair

ham tishna-lab haiñ sāhil-e-be-āb kī tarah

dil ke sadaf meñ ham ne chhupāyā hai umr-bhar

har ashk-e-ġham ko gauhar-e-nāyāb kī tarah

yāroñ ne merī raah meñ kitne ḳhulūs se

kāñTe bichhā.e atlas-o-kamḳhvāb kī tarah

kyā pūchhte ho lazzat-e-zahrāb-e-zindagī

ham pī rahe haiñ hañs ke mai-e-nāb kī tarah

dariyā-e-ġham hai aur safīna hayāt kā

har mauj-e-be-qarār hai girdāb kī tarah

ik hashr-e-iztirāb rag-o-pai meñ hai ravāñ

ik ik lahū kī buuñd hai sīmāb kī tarah

dushvār kis qadar haiñ mohabbat ke marhale

dushman bhī saath saath haiñ ahbāb kī tarah

ye aur baat hai ki rahā pās-e-ġham 'tufail'

be-tāb ham bhī the dil-e-betāb kī tarah

dilkash gurez-pa shab-e-mahtab ki tarah

ye zindagi hai ek hasin KHwab ki tarah

saqi tere karam teri dariya-dili ki KHair

hum tishna-lab hain sahil-e-be-ab ki tarah

dil ke sadaf mein hum ne chhupaya hai umr-bhar

har ashk-e-gham ko gauhar-e-nayab ki tarah

yaron ne meri rah mein kitne KHulus se

kanTe bichhae atlas-o-kamKHwab ki tarah

kya puchhte ho lazzat-e-zahrab-e-zindagi

hum pi rahe hain hans ke mai-e-nab ki tarah

dariya-e-gham hai aur safina hayat ka

har mauj-e-be-qarar hai girdab ki tarah

ek hashr-e-iztirab rag-o-pai mein hai rawan

ek ek lahu ki bund hai simab ki tarah

dushwar kis qadar hain mohabbat ke marhale

dushman bhi sath sath hain ahbab ki tarah

ye aur baat hai ki raha pas-e-gham 'tufail'

be-tab hum bhi the dil-e-betab ki tarah