dilon mein husn-e-yaqin to kuja guman bhi nahin

diloñ meñ husn-e-yaqīñ to kujā gumāñ bhī nahīñ

tum aag DhūñDh rahe ho yahāñ dhuāñ bhī nahīñ

jalā sakegī use barq-e-nā-gahāñ bhī nahīñ

ḳhudī qavī ho to ḳhatre meñ āshiyāñ bhī nahīñ

khaḌe haiñ dasht-e-tahayyur meñ ham kidhar jaa.eñ

jaras kā shor to kyā gard-e-kārvāñ bhī nahīñ

falak pe kauñd rahī hai na jaane kyoñ bijlī

chaman meñ ab to mirī ḳhāk-e-āshiyāñ bhī nahīñ

milā hai ḳhil.at-e-uryānī-e-junūñ sad-shukr

balā se tan pe garebāñ kī dhajjiyāñ bhī nahīñ

qafas se chhūT ke ai bekasī kahāñ jā.ūñ

shikasta baal bhī huuñ yād-e-āshiyāñ bhī nahīñ

hazāroñ haiñ tirī mahfil meñ zamzama-pardāz

fuġhāñ ki mere liye ruḳhsat-e-fuġhāñ bhī nahīñ

paḌī hai jalva-gah-e-dair-o-ka.aba ab vīrāñ

jamāl-e-yār yahāñ bhī nahīñ vahāñ bhī nahīñ

jabīn-e-shauq hai duniyā-e-ishq meñ rusvā

nasīb us ko tirī ḳhāk-e-āstāñ bhī nahīñ

uḌā ke le chal usī ko chaman meñ o par-o-bāl

girāñ qafas bhī nahīñ duur āshiyāñ bhī nahīñ

qimār-e-ishq meñ hāsil hai lazzat-e-jāved

nahīñ jo suud kuchh is meñ na ho ziyāñ bhī nahīñ

ġham-e-jahāñ ne satāyā hai is qadar mujh ko

ki dil meñ yād-e-butāñ kyā ġham-e-butāñ bhī nahīñ

udhar hai darpai-e-taḳhrīb-e-āshiyāñ sayyād

idhar tasavvur-e-ta.amīr-e-āshiyāñ bhī nahīñ

ab aisī naav pe maujoñ kā ham-safar huuñ maiñ

ki nāḳhudā bhī nahīñ aur bādbāñ bhī nahīñ

vajūd-e-barq hai tāmīr-e-āshiyāñ se 'valī'

agar bahār nahīñ mausam-e-ḳhizāñ bhī nahīñ

dilon mein husn-e-yaqin to kuja guman bhi nahin

tum aag DhunDh rahe ho yahan dhuan bhi nahin

jala sakegi use barq-e-na-gahan bhi nahin

KHudi qawi ho to KHatre mein aashiyan bhi nahin

khaDe hain dasht-e-tahayyur mein hum kidhar jaen

jaras ka shor to kya gard-e-karwan bhi nahin

falak pe kaund rahi hai na jaane kyon bijli

chaman mein ab to meri KHak-e-ashiyan bhi nahin

mila hai KHilat-e-uryani-e-junun sad-shukr

bala se tan pe gareban ki dhajjiyan bhi nahin

qafas se chhuT ke ai bekasi kahan jaun

shikasta baal bhi hun yaad-e-ashiyan bhi nahin

hazaron hain teri mahfil mein zamzama-pardaz

fughan ki mere liye ruKHsat-e-fughan bhi nahin

paDi hai jalwa-gah-e-dair-o-kaba ab viran

jamal-e-yar yahan bhi nahin wahan bhi nahin

jabin-e-shauq hai duniya-e-ishq mein ruswa

nasib us ko teri KHak-e-astan bhi nahin

uDa ke le chal usi ko chaman mein o par-o-baal

giran qafas bhi nahin dur aashiyan bhi nahin

qimar-e-ishq mein hasil hai lazzat-e-jawed

nahin jo sud kuchh is mein na ho ziyan bhi nahin

gham-e-jahan ne sataya hai is qadar mujh ko

ki dil mein yaad-e-butan kya gham-e-butan bhi nahin

udhar hai darpai-e-taKHrib-e-ashiyan sayyaad

idhar tasawwur-e-tamir-e-ashiyan bhi nahin

ab aisi naw pe maujon ka ham-safar hun main

ki naKHuda bhi nahin aur baadban bhi nahin

wajud-e-barq hai tamir-e-ashiyan se 'wali'

agar bahaar nahin mausam-e-KHizan bhi nahin