dilon mein koi hawas koi aarzu bhi nahin

diloñ meñ koī havas koī aarzū bhī nahīñ

maiñ sab luTā chukā ab fikr-e-ābrū bhī nahīñ

zamāñ-makāñ se guzar kar huuñ ālam-e-hū meñ

safar tamām huā shauq-e-justujū bhī nahīñ

tire ḳhayāl kī sar-mastiyāñ dimāġh meñ haiñ

ye vo nasha hai ki minnat-kash-e-subū bhī nahīñ

vo band āñkhoñ meñ rah rah ke jagmagātā hai

namāz-e-ishq meñ pābandī-e-vuzū bhī nahīñ

lahū badan meñ jo hotā to kuchh Tapaktā bhī

dahān-e-zaḳhm ko ab hājat-e-rafū bhī nahīñ

'shamīm' le ke kahāñ aa.ī zindagī mujh ko

ajiib shahr hai hamdam kahāñ adū bhī nahīñ

dilon mein koi hawas koi aarzu bhi nahin

main sab luTa chuka ab fikr-e-abru bhi nahin

zaman-makan se guzar kar hun aalam-e-hu mein

safar tamam hua shauq-e-justuju bhi nahin

tere KHayal ki sar-mastiyan dimagh mein hain

ye wo nasha hai ki minnat-kash-e-subu bhi nahin

wo band aankhon mein rah rah ke jagmagata hai

namaz-e-ishq mein pabandi-e-wuzu bhi nahin

lahu badan mein jo hota to kuchh Tapakta bhi

dahan-e-zaKHm ko ab hajat-e-rafu bhi nahin

'shamim' le ke kahan aai zindagi mujh ko

ajib shahr hai hamdam kahan adu bhi nahin