din-ba-din ghaTti hui umr pe nazil ho jae

din-ba-din ghaTtī huī umr pe nāzil ho jaa.e

ik badan aur mirī ruuh ko hāsil ho jaa.e

morche kholtā rahtā huuñ samundar ke ḳhilāf

jis ko miTnā hai vo aa.e mirā sāhil ho jaa.e

khel hī khel meñ chhū luuñ maiñ kinārā apnā

aise so.uuñ ki jagānā mujhe mushkil ho jaa.e

lag ke bīmār ke siine se na ronā aise

zindagānī kī tarah maut bhī mushkil ho jaa.e

rakh rahe haiñ tire patthar mire zaḳhmoñ kā hisāb

ab ye majma.a bhī mire kashf kā qaa.el ho jaa.e

is qadar der na karnā ki ye āseb-nagar

raat kā ruup le aur jism meñ dāḳhil ho jaa.e

jañg apnoñ se hai to dil ko kināre kar luuñ

rāste meñ yahī talvār na haa.el ho jaa.e

din-ba-din ghaTti hui umr pe nazil ho jae

ek badan aur meri ruh ko hasil ho jae

morche kholta rahta hun samundar ke KHilaf

jis ko miTna hai wo aae mera sahil ho jae

khel hi khel mein chhu lun main kinara apna

aise soun ki jagana mujhe mushkil ho jae

lag ke bimar ke sine se na rona aise

zindagani ki tarah maut bhi mushkil ho jae

rakh rahe hain tere patthar mere zaKHmon ka hisab

ab ye majma bhi mere kashf ka qael ho jae

is qadar der na karna ki ye aaseb-nagar

raat ka rup le aur jism mein daKHil ho jae

jang apnon se hai to dil ko kinare kar lun

raste mein yahi talwar na hael ho jae