din-ba-din safha-e-hasti se miTa jata hun

din-ba-din safha-e-hastī se miTā jaatā huuñ

ek jiine ke liye kitnā marā jaatā huuñ

apne pairoñ pe khaḌā boltā paikar huuñ magar

āhaToñ kī tarah mahsūs kiyā jaatā huuñ

tū bhī jaise mirī āñkhoñ meñ khiñchā jaatā hai

maiñ bhī jaise tirī sāñsoñ samā jaatā huuñ

nuur kī shāḳh se TuuTā huā pattā huuñ maiñ

vaqt kī dhuup meñ ma.adūm huā jaatā huuñ

saath chhūTā to kaḌā vaqt zarūr aa.egā

aap kahte haiñ to be-shak maiñ chalā jaatā huuñ

hādse jitnā mujhe duur kiye dete haiñ

utnā manzil se maiñ nazdīk huā jaatā huuñ

dekhne meñ to maiñ zarra nazar aatā huuñ 'salīm'

dekhte dekhte ḳhurshīd pe chhā jaatā huuñ

din-ba-din safha-e-hasti se miTa jata hun

ek jine ke liye kitna mara jata hun

apne pairon pe khaDa bolta paikar hun magar

aahaTon ki tarah mahsus kiya jata hun

tu bhi jaise meri aankhon mein khincha jata hai

main bhi jaise teri sanson sama jata hun

nur ki shaKH se TuTa hua patta hun main

waqt ki dhup mein madum hua jata hun

sath chhuTa to kaDa waqt zarur aaega

aap kahte hain to be-shak main chala jata hun

hadse jitna mujhe dur kiye dete hain

utna manzil se main nazdik hua jata hun

dekhne mein to main zarra nazar aata hun 'salim'

dekhte dekhte KHurshid pe chha jata hun