din Dhal chuka tha aur parinda safar mein tha

din Dhal chukā thā aur parinda safar meñ thā

saarā lahū badan kā ravāñ musht-e-par meñ thā

jaate kahāñ ki raat kī bāñheñ thiiñ mushta.il

chhupte kahāñ ki saarā jahāñ apne ghar meñ thā

had-e-ufuq pe shaam thī ḳheme meñ muntazir

aañsū kā ik pahāḌ sā haa.il nazar meñ thā

lo vo bhī ḳhushk ret ke Tiile meñ Dhal gayā

kal tak jo ek koh-e-girāñ rahguzar meñ thā

utrā thā vahshī chiḌiyoñ kā lashkar zamīn par

phir ik bhī sabz paat na saare nagar meñ thā

pāgal sī ik sadā kisī ujḌe makāñ meñ thī

khiḌkī meñ ik charāġh bharī-dopahar meñ thā

us kā badan thā ḳhauf kī hiddat se sho.ala-vash

sūraj kā ik gulāb sā tasht-e-sahar meñ thā

din Dhal chuka tha aur parinda safar mein tha

sara lahu badan ka rawan musht-e-par mein tha

jate kahan ki raat ki banhen thin mushtail

chhupte kahan ki sara jahan apne ghar mein tha

had-e-ufuq pe sham thi KHeme mein muntazir

aansu ka ek pahaD sa hail nazar mein tha

lo wo bhi KHushk ret ke Tile mein Dhal gaya

kal tak jo ek koh-e-giran rahguzar mein tha

utra tha wahshi chiDiyon ka lashkar zamin par

phir ek bhi sabz pat na sare nagar mein tha

pagal si ek sada kisi ujDe makan mein thi

khiDki mein ek charagh bhari-dopahar mein tha

us ka badan tha KHauf ki hiddat se shoala-wash

suraj ka ek gulab sa tasht-e-sahar mein tha