din ki dahliz pe Thahre hue sae bhi gae

din kī dahlīz pe Thahre hue saa.e bhī ga.e

raat kyā aa.ī ki apne bhī parā.e bhī ga.e

'aks tā'bīr kā ubhre ye tamannā hī rahī

aa.ine ḳhvāb ke āñkhoñ ko dikhā.e bhī ga.e

tohmat-e-ḳhosha-e-gandum hai abhī tak sar par

ham uchhāle bhī ga.e ham ki girā.e bhī ga.e

shajar-e-dard ki kal bhī thā harā aaj bhī hai

vaqt kī dhuup meñ ham garche jalā.e bhī ga.e

ham to un meñ haiñ jo rote haiñ to rote hī raheñ

tum vo ḳhush-baḳht ki ro.e to hañsā.e bhī ga.e

qissa-e-dard bahar-hāl sunātī hī rahī

garche dīvār pe sau rang chaḌhā.e bhī ga.e

din ki dahliz pe Thahre hue sae bhi gae

raat kya aai ki apne bhi parae bhi gae

'aks ta'bir ka ubhre ye tamanna hi rahi

aaine KHwab ke aankhon ko dikhae bhi gae

tohmat-e-KHosha-e-gandum hai abhi tak sar par

hum uchhaale bhi gae hum ki girae bhi gae

shajar-e-dard ki kal bhi tha hara aaj bhi hai

waqt ki dhup mein hum garche jalae bhi gae

hum to un mein hain jo rote hain to rote hi rahen

tum wo KHush-baKHt ki roe to hansae bhi gae

qissa-e-dard bahar-haal sunati hi rahi

garche diwar pe sau rang chaDhae bhi gae