din ki jaanib kabhi us raat se rasta nikle

din kī jānib kabhī us raat se rasta nikle

baaġh kī samt bhī fōtpath se rasta nikle

shāyad ik aur mulāqāt kī ummīd bañdhe

ik sar-e-rāh mulāqāt se rasta nikle

maiñ bhī ab DhūñDhtī rahtī huuñ bahāne kyā kyā

us se kuchh baat karūñ baat se rasta nikle

ain mumkin hai ye duniyā kā ho markaz mirī zaat

mujh tak aa.e jo samāvāt se rasta nikle

shahr ke raste kahīñ shahr meñ kho jaate haiñ

shahr ko ab koī dehāt se rasta nikle

khul ke ro luuñ to ye dīvār haTe duurī kī

abr barse to ye barsāt se rasta nikle

mujh ko us maat kā afsos nahīñ hai 'jānāñ'

jiit kī samt jo us maat se rasta nikle

din ki jaanib kabhi us raat se rasta nikle

bagh ki samt bhi footpath se rasta nikle

shayad ek aur mulaqat ki ummid bandhe

ek sar-e-rah mulaqat se rasta nikle

main bhi ab DhunDhti rahti hun bahane kya kya

us se kuchh baat karun baat se rasta nikle

ain mumkin hai ye duniya ka ho markaz meri zat

mujh tak aae jo samawat se rasta nikle

shahr ke raste kahin shahr mein kho jate hain

shahr ko ab koi dehat se rasta nikle

khul ke ro lun to ye diwar haTe duri ki

abr barse to ye barsat se rasta nikle

mujh ko us mat ka afsos nahin hai 'jaanan'

jit ki samt jo us mat se rasta nikle