din pe likkha to kabhi raat pe likkha jae

din pe likkhā to kabhī raat pe likkhā jaa.e

kyā zarūrī hai ki har baat pe likkhā jaa.e

dasht kī jumla rivāyāt ko yakjā kar ke

hijr-zādoñ kī muhimmāt pe likkhā jaa.e

koī pūchhe bhī to maiñ baat badal letī huuñ

mujh se kab talḳhī-e-hālāt pe likkhā jaa.e

ye mohabbat kī karāmat hai ki ab naam tirā

kuchh bhī likkhūñ to mire haath se likkhā jaa.e

ik qasīda ho raqam un ko bulāne ke liye

dūsrā vaqt-e-mulāqāt pe likkhā jaa.e

maiñ ne likkhe nahīñ shāhoñ ke hikāyat-nāme

saḳht mushkil thā ḳhurāfāt pe likkhā jaa.e

aap chāheñ to duāoñ ko ikaTThā kar luuñ

aap chāheñ to munājāt pe likkhā jaa.e

ye mohabbat kī vasiyyat hai so ai dast-e-havā

is ko har phuul pe har paat pe likkhā jaa.e

jo masā.ib ke likhārī hoñ 'farah' ab un se

kaise mumkin hai futūhāt pe likkhā jaa.e

din pe likkha to kabhi raat pe likkha jae

kya zaruri hai ki har baat pe likkha jae

dasht ki jumla riwayat ko yakja kar ke

hijr-zadon ki muhimmat pe likkha jae

koi puchhe bhi to main baat badal leti hun

mujh se kab talKHi-e-haalat pe likkha jae

ye mohabbat ki karamat hai ki ab nam tera

kuchh bhi likkhun to mere hath se likkha jae

ek qasida ho raqam un ko bulane ke liye

dusra waqt-e-mulaqat pe likkha jae

main ne likkhe nahin shahon ke hikayat-name

saKHt mushkil tha KHurafat pe likkha jae

aap chahen to duaon ko ikaTTha kar lun

aap chahen to munajat pe likkha jae

ye mohabbat ki wasiyyat hai so ai dast-e-hawa

is ko har phul pe har pat pe likkha jae

jo masaib ke likhaari hon 'farah' ab un se

kaise mumkin hai futuhat pe likkha jae