dinon ki hafte mein tadad sat Thahri hai

dinoñ kī hafte meñ ta.adād saat Thahrī hai

isī madār meñ kul kā.enāt Thahrī hai

thirak rahe haiñ mire lab muḳhātabat meñ tabhī

zabāñ kī nok pe kuchh aisī baat Thahrī hai

ghaTā machaltī hai bādal kī us ke āñchal par

darāz gesuoñ meñ us ke raat Thahrī hai

bahār naam huā terā pairāhan khulnā

tire badan kī ḳhizāñ-rut zakāt Thahrī hai

tumhāre gaal se surḳhī churā.ī vaqt-e-sahar

nazar kaTār kī jaise nashāt Thahrī hai

ye aaTā gūñdhte hāthoñ ke lams kī saugand

tirī kalā.ī ke sadqe parāt Thahrī hai

tire huzūr mire saañs sahl haiñ mujh par

badan meñ diid se terī hayāt Thahrī hai

ye rakh-rakhāv tirā nāzukī bharā lahja

tire bayān pe saarī siqāt Thahrī hai

kisī kī baat pe Thahrāv kab huā apnā

tumhārī baat pe aa.e to baat Thahrī hai

tarah tarah kī shabāhat bayāñ huī 'alvī'

ye raat din na huī phir bhī raat Thahrī hai

dinon ki hafte mein tadad sat Thahri hai

isi madar mein kul kaenat Thahri hai

thirak rahe hain mere lab muKHatabat mein tabhi

zaban ki nok pe kuchh aisi baat Thahri hai

ghaTa machalti hai baadal ki us ke aanchal par

daraaz gesuon mein us ke raat Thahri hai

bahaar nam hua tera pairahan khulna

tere badan ki KHizan-rut zakat Thahri hai

tumhaare gal se surKHi churai waqt-e-sahar

nazar kaTar ki jaise nashat Thahri hai

ye aaTa gundhte hathon ke lams ki saugand

teri kalai ke sadqe paraat Thahri hai

tere huzur mere sans sahl hain mujh par

badan mein did se teri hayat Thahri hai

ye rakh-rakhaw tera nazuki bhara lahja

tere bayan pe sari siqat Thahri hai

kisi ki baat pe Thahraw kab hua apna

tumhaari baat pe aae to baat Thahri hai

tarah tarah ki shabahat bayan hui 'alwi'

ye raat din na hui phir bhi raat Thahri hai