diya hai dil tumhein apna samajh kar

diyā hai dil tumheñ apnā samajh kar

amānat hai ise rakhnā samajh kar

chaḌhā.ī teġh-e-abrū kyā samajh kar

ham aa.e qatl kī iimā samajh kar

na bal khaa.e kahīñ dast-e-nazākat

uThā.iye zarā pardā samajh kar

sharāb-e-shauq se sāqī-e-mad.hosh

hamāre zaḳhm ko bharnā samajh kar

mujhe mehrāb-e-abrū bas hai terī

karūñ sajda tujhe ka.aba samajh kar

nahīñ matlab hameñ dair-o-haram se

jahāñ jaate haiñ ghar terā samajh kar

chaman meñ chahchahā ab shāḳh-e-gul par

tū karnā bulbul-e-shaidā samajh kar

har ik kūche meñ mere vāste tifl

liye patthar haiñ dīvānā samajh kar

mah-e-gardūñ pe shab ko chāñdnī meñ

nazar kartā huuñ ruḳh terā samajh kar

gale par qātil-e-be-rahm mere

chalāyā tū ne 'ḳhanjar' kyā samajh kar

diya hai dil tumhein apna samajh kar

amanat hai ise rakhna samajh kar

chaDhai tegh-e-abru kya samajh kar

hum aae qatl ki ima samajh kar

na bal khae kahin dast-e-nazakat

uThaiye zara parda samajh kar

sharab-e-shauq se saqi-e-madhosh

hamare zaKHm ko bharna samajh kar

mujhe mehrab-e-abru bas hai teri

karun sajda tujhe kaba samajh kar

nahin matlab hamein dair-o-haram se

jahan jate hain ghar tera samajh kar

chaman mein chahchaha ab shaKH-e-gul par

tu karna bulbul-e-shaida samajh kar

har ek kuche mein mere waste tifl

liye patthar hain diwana samajh kar

mah-e-gardun pe shab ko chandni mein

nazar karta hun ruKH tera samajh kar

gale par qatil-e-be-rahm mere

chalaya tu ne 'KHanjar' kya samajh kar