diya jab jam-e-mai saqi ne bhar ke

diyā jab jām-e-mai saaqī ne bhar ke

to pachhtā.e bahut ham tauba kar ke

lipaT jaao gale se vaqt-e-āḳhir

ki phir jiitā nahīñ hai koī mar ke

vahāñ se aa ke us kī bhī phirī aañkh

vo tevar hī nahīñ ab nāma-bar ke

koī jab pūchhtā hai haal dil kā

to ro dete haiñ ham ik aah bhar ke

guloñ ke ishq meñ de jaan bulbul

are ye hausle ek musht par ke

ḳhudā mahfūz rakkhe un kī zid se

jo kahte haiñ dikhā dete haiñ kar ke

raheñge ḳhaak meñ ham ko milā kar

tire andāz is nīchī nazar ke

dimāġh apnā na kyuuñ kar arsh par ho

ye samjho to gadā haiñ kis ke dar ke

huī hai qaid se bad-tar rihā.ī

kiyā āzād us ne par katar ke

uThe jaate haiñ lo duniyā se ham aaj

miTe jaate haiñ jhagḌe umr bhar ke

'hafīz' ab naala o fariyād chhoḌo

koī din yuuñ bhī dekho sabr kar ke

diya jab jam-e-mai saqi ne bhar ke

to pachhtae bahut hum tauba kar ke

lipaT jao gale se waqt-e-aKHir

ki phir jita nahin hai koi mar ke

wahan se aa ke us ki bhi phiri aankh

wo tewar hi nahin ab nama-bar ke

koi jab puchhta hai haal dil ka

to ro dete hain hum ek aah bhar ke

gulon ke ishq mein de jaan bulbul

are ye hausle ek musht par ke

KHuda mahfuz rakkhe un ki zid se

jo kahte hain dikha dete hain kar ke

rahenge KHak mein hum ko mila kar

tere andaz is nichi nazar ke

dimagh apna na kyun kar arsh par ho

ye samjho to gada hain kis ke dar ke

hui hai qaid se bad-tar rihai

kiya aazad us ne par katar ke

uThe jate hain lo duniya se hum aaj

miTe jate hain jhagDe umr bhar ke

'hafiz' ab nala o fariyaad chhoDo

koi din yun bhi dekho sabr kar ke