diya mauqa nahin KHud ko na un zaKHmon ko bharne ka

diyā mauqa nahīñ ḳhud ko na un zaḳhmoñ ko bharne kā

hunar aaya nahīñ mujh ko vafā kar ke badalne kā

nikal kar aañkh se ye ashk jab dil tak pahuñchte haiñ

tabhī matlab samajh aatā namak zaḳhmoñ pe paḌne kā

baḌī jaldī utārā aaj us ne qabr meñ mujh ko

kiyā kartā thā jo va.ada hamesha saath chalne kā

nayā kandhā vo khojegā shab-e-mātam guzarte hī

dikhāvā phir karegā vo mohabbat meñ bikharne kā

gulāboñ se sajā hogā parāyā haath phir koī

bhalā vo kab talak yuuñ ġham karegā mere marne kā

diya mauqa nahin KHud ko na un zaKHmon ko bharne ka

hunar aaya nahin mujh ko wafa kar ke badalne ka

nikal kar aankh se ye ashk jab dil tak pahunchte hain

tabhi matlab samajh aata namak zaKHmon pe paDne ka

baDi jaldi utara aaj us ne qabr mein mujh ko

kiya karta tha jo wada hamesha sath chalne ka

naya kandha wo khojega shab-e-matam guzarte hi

dikhawa phir karega wo mohabbat mein bikharne ka

gulabon se saja hoga paraya hath phir koi

bhala wo kab talak yun gham karega mere marne ka