diye bhi hon to pujari suraj ke sans kya lenge tirgi mein

diye bhī hoñ to pujārī sūraj ke saañs kyā leñge tīrgī meñ

kaho patangoñ se raqs kar leñ charāġh kī dhīmī raushnī meñ

muaaf ai nāz-e-rahnumā.ī pahuñch ke manzil pe bhī na paa.ī

vo lazzat-e-ḳhvāb jo mayassar huī sar-e-rāh-e-ḳhastagī meñ

vafā ko thoḌī sī be-niyāzī kam-iltifātī ne terī de dī

ab aur kyā chāhiye ḳhudī ko tirī mohabbat kī be-ḳhudī meñ

chhupī na jab ḳhāk-e-āstāñ se chhupegī kyā chashm-e-nukta-dāñ se

vo ik shikan jo zarā sī ubhrī jabīn-e-majbūr-e-bandagī se

idhar añdhere kī la.anteñ haiñ udhar ujāle kī zahmateñ haiñ

tire musāfir lagā.eñ bistar kahāñ pe sahrā-e-zindagī meñ

'jamīl' ham uTh ke gir paḌe aur guzar gayā kārvāñ hamārā

ġhubār kī baat tak na pūchhī musāfiroñ ne ravā-ravī meñ

diye bhi hon to pujari suraj ke sans kya lenge tirgi mein

kaho patangon se raqs kar len charagh ki dhimi raushni mein

muaf ai naz-e-rahnumai pahunch ke manzil pe bhi na pai

wo lazzat-e-KHwab jo mayassar hui sar-e-rah-e-KHastagi mein

wafa ko thoDi si be-niyazi kam-iltifati ne teri de di

ab aur kya chahiye KHudi ko teri mohabbat ki be-KHudi mein

chhupi na jab KHak-e-astan se chhupegi kya chashm-e-nukta-dan se

wo ek shikan jo zara si ubhri jabin-e-majbur-e-bandagi se

idhar andhere ki lanten hain udhar ujale ki zahmaten hain

tere musafir lagaen bistar kahan pe sahra-e-zindagi mein

'jamil' hum uTh ke gir paDe aur guzar gaya karwan hamara

ghubar ki baat tak na puchhi musafiron ne rawa-rawi mein