do damon se hai faqat gor-e-ghariban aabaad

do damoñ se hai faqat gor-e-ġharībāñ ābād

tum hamesha raho ai hasrat-o-armāñ ābād

tujh se ai dard hai qasr-e-dil-e-vīrāñ ābād

kyā sar-afrāz kiyā ḳhāna-vīrāñ ābād

jis jagah baiTh ke ro.e vo makāñ Duub ga.e

shahr hone nahīñ dete tire giryāñ ābād

qais-o-farhād ke dam se bhī 'ajab raunaq thī

kuchh dinoñ ḳhuub rahe koh-o-bayābāñ ābād

vahshat-e-dil ye baḌhī chhoḌ diye ghar sab ne

tum hue ḳhāna-nashīñ ho ga.iiñ galiyāñ ābād

āmad-e-qāfila-e-dard-o-alam hai sad-shukr

aaj hotī hai sarā-e-dil-e-vīrāñ ābād

miT ga.e dāġh-e-jigar husn-e-ruḳh-e-yār gayā

kal kī hai baat ki thā kyā ye gulistāñ ābād

tere dīvānoñ ke jis dasht se uTThe bistar

vahshiyoñ se na huā phir vo bayābāñ ābād

sūrat-e-sham' huā ḳhāk-e-badan jal jal kar

ham ne turbat bhī na kī ai shab-e-hijrāñ ābād

sohbateñ ho ga.iiñ barbād gul-andāmoñ kī

ḳhaak uḌtī hai vahāñ the jo gulistāñ ābād

siina o dil meñ ḳhushī se na jagah thī ġham kī

ai 'ta'ashshuq' ye makāñ bhī the kabhī haañ ābād

do damon se hai faqat gor-e-ghariban aabaad

tum hamesha raho ai hasrat-o-arman aabaad

tujh se ai dard hai qasr-e-dil-e-viran aabaad

kya sar-afraaz kiya KHana-viran aabaad

jis jagah baiTh ke roe wo makan Dub gae

shahr hone nahin dete tere giryan aabaad

qais-o-farhad ke dam se bhi 'ajab raunaq thi

kuchh dinon KHub rahe koh-o-bayaban aabaad

wahshat-e-dil ye baDhi chhoD diye ghar sab ne

tum hue KHana-nashin ho gain galiyan aabaad

aamad-e-qafila-e-dard-o-alam hai sad-shukr

aaj hoti hai sara-e-dil-e-viran aabaad

miT gae dagh-e-jigar husn-e-ruKH-e-yar gaya

kal ki hai baat ki tha kya ye gulistan aabaad

tere diwanon ke jis dasht se uTThe bistar

wahshiyon se na hua phir wo bayaban aabaad

surat-e-sham' hua KHak-e-badan jal jal kar

hum ne turbat bhi na ki ai shab-e-hijran aabaad

sohbaten ho gain barbaad gul-andamon ki

KHak uDti hai wahan the jo gulistan aabaad

sina o dil mein KHushi se na jagah thi gham ki

ai 'ta'ashshuq' ye makan bhi the kabhi han aabaad