do din ki hansi do din ki KHushi anjam-e-amal rona hi paDa

do din kī hañsī do din kī ḳhushī anjām-e-amal ronā hī paḌā

ik umr gañvā.ī jis ke liye ik roz use khonā hī paḌā

ham aur alā.eq se chhūTeñ mumkin nahīñ jab tak ham ham haiñ

dariyā ko ba-īñ āzād-ravī zanjīr-ba-pā honā hī paḌā

bāzār meñ aa kar nādāñ dil manzar ke khilaunoñ par machlā

aur pīr-e-ḳhird ko kāñdhe par ambār-e-nazar Dhonā hī paḌā

kyā jāniye āḳhir kyoñ itnī āzurda rahī hoñToñ se hañsī

qismat pe bhī hañsnā jab chāhā aa.ī na hañsī ronā hī paḌā

ham tuḳhm-e-mohabbat jannat se siine meñ churā kar le aa.e

is ret meñ kyā ugtā vo bhalā haañ laa.e the bonā hī paḌā

bedār-dilī ke mansūbe ham kyā kyā bāñdh ke aa.e the

duniyā ne thapak kar lorī dī niiñd aa hī ga.ī sonā hī paḌā

do din ki hansi do din ki KHushi anjam-e-amal rona hi paDa

ek umr ganwai jis ke liye ek roz use khona hi paDa

hum aur alaeq se chhuTen mumkin nahin jab tak hum hum hain

dariya ko ba-in aazad-rawi zanjir-ba-pa hona hi paDa

bazar mein aa kar nadan dil manzar ke khilaunon par machla

aur pir-e-KHird ko kandhe par ambar-e-nazar Dhona hi paDa

kya jaaniye aaKHir kyon itni aazurda rahi honTon se hansi

qismat pe bhi hansna jab chaha aai na hansi rona hi paDa

hum tuKHm-e-mohabbat jannat se sine mein chura kar le aae

is ret mein kya ugta wo bhala han lae the bona hi paDa

bedar-dili ke mansube hum kya kya bandh ke aae the

duniya ne thapak kar lori di nind aa hi gai sona hi paDa