do din se eqtidar mein kya aa gaya KHuda

do din se eqtidār meñ kyā aa gayā ḳhudā

har aadmī pukār rahā hai ḳhudā ḳhudā

niklegā kab añdheroñ ke narġhe se aadmī

TūTegā kab burā.ī kā ye dā.era ḳhudā

uljhā huuñ jaane kab se tazabzub ke jaal meñ

manzar dikhā de mujh ko tū us paar kā ḳhudā

har lamha sab ke haal kī rakhtā hai tū ḳhabar

kuchh apnā haal bhī to kisī ko batā ḳhudā

hai kitnī qīmtī ye mirī bandagī na pūchh

sadiyoñ ke baad mujh ko milā hai mirā ḳhudā

muusā kī fikr aur hai fir'aun kī kuchh aur

chhoTā kisī se hai to kisī se baḌā ḳhudā

sahmā huā thā jis kī bulandī se maiñ bahut

vo āsmān sar pe mire aa girā ḳhudā

taskīn ho yahāñ ke nazāroñ se kyā mujhe

manzar mirī nigāh meñ hai duur kā ḳhudā

'najmī' jamāl sang-e-ġhazal ko tarāsh kar

ik but banā rahā thā magar ban gayā ḳhudā

do din se eqtidar mein kya aa gaya KHuda

har aadmi pukar raha hai KHuda KHuda

niklega kab andheron ke narghe se aadmi

TuTega kab burai ka ye daera KHuda

uljha hun jaane kab se tazabzub ke jal mein

manzar dikha de mujh ko tu us par ka KHuda

har lamha sab ke haal ki rakhta hai tu KHabar

kuchh apna haal bhi to kisi ko bata KHuda

hai kitni qimti ye meri bandagi na puchh

sadiyon ke baad mujh ko mila hai mera KHuda

musa ki fikr aur hai fir'aun ki kuchh aur

chhoTa kisi se hai to kisi se baDa KHuda

sahma hua tha jis ki bulandi se main bahut

wo aasman sar pe mere aa gira KHuda

taskin ho yahan ke nazaron se kya mujhe

manzar meri nigah mein hai dur ka KHuda

'najmi' jamal sang-e-ghazal ko tarash kar

ek but bana raha tha magar ban gaya KHuda