donon aalam se ayan tha mujhe malum na tha

donoñ aalam se ayaañ thā mujhe ma.alūm na thā

tū hī to jalva-kunāñ thā mujhe ma.alūm na thā

qalb-e-muztar meñ mire mehr-o-vafā kī sūrat

nuur kā ek jahāñ thā mujhe ma.alūm na thā

dard-e-kaunain uThā rakkhā thā allāh allāh

dil mirā kitnā javāñ thā mujhe ma.alūm na thā

tū mirī mahfil-e-afkār sajāne ke liye

ruuh meñ nuur fashāñ thā mujhe ma.alūm na thā

zīnat-e-farsh rahā yā sar-e-qausain rahā

terā mahbūb kahāñ thā mujhe ma.alūm na thā

jo bahā fart-e-nadāmat se huzūrī meñ tirī

kitnā vo ashk garāñ thā mujhe ma.alūm na thā

lāla-o-gul meñ fazāoñ meñ mah-o-anjum meñ

terā hī nuur nihāñ thā mujhe ma.alūm na thā

bāġh-e-hastī meñ jalā merā vajūd-e-hastī

sūrat-e-fasl-e-ḳhizāñ thā mujhe ma.alūm na thā

donon aalam se ayan tha mujhe malum na tha

tu hi to jalwa-kunan tha mujhe malum na tha

qalb-e-muztar mein mere mehr-o-wafa ki surat

nur ka ek jahan tha mujhe malum na tha

dard-e-kaunain uTha rakkha tha allah allah

dil mera kitna jawan tha mujhe malum na tha

tu meri mahfil-e-afkar sajaane ke liye

ruh mein nur fashan tha mujhe malum na tha

zinat-e-farsh raha ya sar-e-qausain raha

tera mahbub kahan tha mujhe malum na tha

jo baha fart-e-nadamat se huzuri mein teri

kitna wo ashk garan tha mujhe malum na tha

lala-o-gul mein fazaon mein mah-o-anjum mein

tera hi nur nihan tha mujhe malum na tha

bagh-e-hasti mein jala mera wajud-e-hasti

surat-e-fasl-e-KHizan tha mujhe malum na tha