Dore Dale lal pari hai aankhon mein

Dore Daale laal parī hai āñkhoñ meñ

so bhī jaao niiñd bharī hai āñkhoñ meñ

phir mayyat ke baar se palkeñ bojhal haiñ

phir koī ummīd mirī hai āñkhoñ meñ

dīda-varī ke sab qisse un se mansūb

apnī sarvat-e-kam-nazarī hai āñkhoñ meñ

āñkhoñ meñ kaTtī hai shab vo kyā jāneñ

be-ḳhabarī sī be-ḳhabarī hai āñkhoñ meñ

ek nazar meñ dil kā sab āzār gayā

yaar ġhazab kī chāragarī hai āñkhoñ meñ

dil kā taa.ir ab bhī naġhme gaatā hai

shāyad koī shāḳh harī hai āñkhoñ meñ

chaar huiiñ to raste kī dīvār huiiñ

kyā nazroñ kī rāhbarī hai āñkhoñ meñ

niiñd meñ bhī un kī palkeñ vā rahtī haiñ

jaane kis kī muntazarī hai āñkhoñ meñ

merī rāhat merā haz merā ārām

saarī daulat tū ne dharī hai āñkhoñ meñ

Dore Dale lal pari hai aankhon mein

so bhi jao nind bhari hai aankhon mein

phir mayyat ke bar se palken bojhal hain

phir koi ummid meri hai aankhon mein

dida-wari ke sab qisse un se mansub

apni sarwat-e-kam-nazari hai aankhon mein

aankhon mein kaTti hai shab wo kya jaanen

be-KHabari si be-KHabari hai aankhon mein

ek nazar mein dil ka sab aazar gaya

yar ghazab ki chaaragari hai aankhon mein

dil ka tair ab bhi naghme gata hai

shayad koi shaKH hari hai aankhon mein

chaar huin to raste ki diwar huin

kya nazron ki rahbari hai aankhon mein

nind mein bhi un ki palken wa rahti hain

jaane kis ki muntazari hai aankhon mein

meri rahat mera haz mera aaram

sari daulat tu ne dhari hai aankhon mein