dosh-e-hawa pe tinkon ka ye aashiyana kya

dosh-e-havā pe tinkoñ kā ye āshiyāna kyā

jis ko ujaḌ hī jaanā hai vo ghar basānā kyā

ham ko chhupā rahe ho ye āḳhir hamīñ se kyuuñ

ham se milā rahe ho hameñ ġhā.ebāna kyā

ham kaun juzv-e-ḳhās kisī dāstāñ ke the

kaisā hamārā zikr hamārā fasāna kyā

āñkhoñ meñ ashk rok liye is ḳhayāl se

miTTī meñ motiyoñ kā luTā.eñ ḳhazāna kyā

vo bazm-e-dostāñ na vo ab kū-e-dilbarāñ

bāhar nikal ke ghar se kahīñ aanā jaanā kyā

maqsad ye kyā nahīñ hai ki dushman ko ho shikast

ye jañg ho rahī hai koī dostāna kyā

jab sab yahāñ ḳhamosh haiñ dīvār kī tarah

phir sunñā kyā kisī se kisī ko sunānā kyā

'mohsin' kahīñ bhī le ke hameñ āb-o-dāna jaa.e

apnā yahāñ pe Thaur koī kyā Thikānā kyā

dosh-e-hawa pe tinkon ka ye aashiyana kya

jis ko ujaD hi jaana hai wo ghar basana kya

hum ko chhupa rahe ho ye aaKHir hamin se kyun

hum se mila rahe ho hamein ghaebana kya

hum kaun juzw-e-KHas kisi dastan ke the

kaisa hamara zikr hamara fasana kya

aankhon mein ashk rok liye is KHayal se

miTTi mein motiyon ka luTaen KHazana kya

wo bazm-e-dostan na wo ab ku-e-dilbaran

bahar nikal ke ghar se kahin aana jaana kya

maqsad ye kya nahin hai ki dushman ko ho shikast

ye jang ho rahi hai koi dostana kya

jab sab yahan KHamosh hain diwar ki tarah

phir sunna kya kisi se kisi ko sunana kya

'mohsin' kahin bhi le ke hamein aab-o-dana jae

apna yahan pe Thaur koi kya Thikana kya