dost ban kar aae koi aur gale hans kar lage

dost ban kar aa.e koī aur gale hans kar lage

ek arsa ho gayā hai piiTh meñ ḳhanjar lage

kis qadar bechain rahtā huuñ ki mujh bīmār ko

duur se aatā huā har shaḳhs chārāgar lage

ek muddat kā maiñ jaagā is bharam meñ so gayā

kyā pata mujh ko ye duniyā ḳhvāb meñ behtar lage

qabl to merā ye ronā thā koī nazdīk ho

ab ye aalam hai ki mujh ko mahfiloñ se Dar lage

itne chehre aañkh se guzre haiñ us kī khoj meñ

ain mumkin hai mirā ho jaa.e to dīgar lage

ab to mujh ko rañg hī bhāte nahīñ tab to terī

zulf ke saa.e dhanak ke rañgoñ se baḌh kar lage

dost ban kar aae koi aur gale hans kar lage

ek arsa ho gaya hai piTh mein KHanjar lage

kis qadar bechain rahta hun ki mujh bimar ko

dur se aata hua har shaKHs chaaragar lage

ek muddat ka main jaga is bharam mein so gaya

kya pata mujh ko ye duniya KHwab mein behtar lage

qabl to mera ye rona tha koi nazdik ho

ab ye aalam hai ki mujh ko mahfilon se Dar lage

itne chehre aankh se guzre hain us ki khoj mein

ain mumkin hai mera ho jae to digar lage

ab to mujh ko rang hi bhate nahin tab to teri

zulf ke sae dhanak ke rangon se baDh kar lage