dost koi jo moatabar na raha

dost koī jo mo'atabar na rahā

e.atibār apne aap par na rahā

rāhbar se jo be-ḳhabar na rahā

rāhzan kā usī ko Dar na rahā

fasl aa.ī hai jab se patjhaḌ kī

saaya vaalā koī shajar na rahā

ḳhāksārī meñ ho gayā mash.hūr

kaj-kulāhī liye jo sar na rahā

aan rakh kar vo jaan se khelā

maat khāne kā jis ko Dar na rahā

jis meñ sadiyāñ samā ga.iiñ vo suḳhan

muḳhtasar ho ke muḳhtasar na rahā

aadmī kī kamī nahīñ 'nādim'

ādamiyyat liye bashar na rahā

dost koi jo mo'atabar na raha

eatibar apne aap par na raha

rahbar se jo be-KHabar na raha

rahzan ka usi ko Dar na raha

fasl aai hai jab se patjhaD ki

saya wala koi shajar na raha

KHaksari mein ho gaya mashhur

kaj-kulahi liye jo sar na raha

aan rakh kar wo jaan se khela

mat khane ka jis ko Dar na raha

jis mein sadiyan sama gain wo suKHan

muKHtasar ho ke muKHtasar na raha

aadmi ki kami nahin 'nadim'

aadamiyyat liye bashar na raha