dosti ya thi dushmani meri

dostī yā thī dushmanī merī

zindagī se nahīñ banī merī

haal aisā nahīñ ki batlā.ūñ

aisī hālat na thī ki thī merī

haath thāmā bhī aur chhoḌ diyā

jeb raste meñ kaT ga.ī merī

aa gayā yaad us ko koī kaam

beach meñ baat rah ga.ī merī

vo mirī zindagī kā hāsil thā

jis ko samjhe the dil-lagī merī

yā mohabbat kī laġhzisheñ thiiñ bahut

yā thī un meñ koī kamī merī

dil ke vīrān dasht-o-sahrā meñ

shor kartī hai ḳhāmushī merī

na hoī jo kabhī kisī se bhī

vo mohabbat thī āḳhirī mary

roz likhtā huuñ ik na.ī rūdād

āp-bītī hai shā.irī merī

ab bhī maiñ tum ko yaad aatā huuñ

ab bhī paḌhtī ho shā.irī merī

zindagī kā ma.aal itnā hai

umr kaTnī thī kaT ga.ī merī

kyā zarūrī thā hijr kā rasta

yā usī meñ thī behtarī merī

so rahā thā maiñ ḳhvāb ko oḌhe

ḳhvāb meñ aañkh khul ga.ī merī

bas meñ apnā nahīñ rahā 'kāzim'

mujh pe hañstī hai bebasī merī

dosti ya thi dushmani meri

zindagi se nahin bani meri

haal aisa nahin ki batlaun

aisi haalat na thi ki thi meri

hath thama bhi aur chhoD diya

jeb raste mein kaT gai meri

aa gaya yaad us ko koi kaam

beach mein baat rah gai meri

wo meri zindagi ka hasil tha

jis ko samjhe the dil-lagi meri

ya mohabbat ki laghzishen thin bahut

ya thi un mein koi kami meri

dil ke viran dasht-o-sahra mein

shor karti hai KHamushi meri

na hoi jo kabhi kisi se bhi

wo mohabbat thi aaKHiri mary

roz likhta hun ek nai rudad

aap-biti hai shairi meri

ab bhi main tum ko yaad aata hun

ab bhi paDhti ho shairi meri

zindagi ka maal itna hai

umr kaTni thi kaT gai meri

kya zaruri tha hijr ka rasta

ya usi mein thi behtari meri

so raha tha main KHwab ko oDhe

KHwab mein aankh khul gai meri

bas mein apna nahin raha 'kazim'

mujh pe hansti hai bebasi meri