dua karo ki mohabbat ke bab mein khul jae

du'ā karo ki mohabbat ke baab meñ khul jaa.e

ab us ke naam kā safha kitāb meñ khul jaa.e

ḳhudā hī jaane natīje meñ kyā khulegā agar

kisī kī pyaas kī shiddat sarāb meñ khul jaa.e

ye vāqi'a bhī ġhazab hogā tajrabe ko agar

mirā savāl tumhāre javāb meñ khul jaa.e

agar ho aisā to kaise chukāoge mujh ko

ki merā qarz tumhāre hisāb meñ khul jaa.e

tum apnī raa.e badal logī jaan mere liye

tumhārī niiñd agar mere ḳhvāb meñ khul jaa.e

maiñ is umiid pe bīnā.ī ḳharch kar rahā huuñ

kisī kā chehra kisī kī naqāb meñ khul jaa.e

yahī du'ā hai ki har shaḳhs bolnā sīkhe

ki jo habāb ho ab ke 'azāb meñ khul jaa.e

du'a karo ki mohabbat ke bab mein khul jae

ab us ke nam ka safha kitab mein khul jae

KHuda hi jaane natije mein kya khulega agar

kisi ki pyas ki shiddat sarab mein khul jae

ye waqi'a bhi ghazab hoga tajrabe ko agar

mera sawal tumhaare jawab mein khul jae

agar ho aisa to kaise chukaoge mujh ko

ki mera qarz tumhaare hisab mein khul jae

tum apni rae badal logi jaan mere liye

tumhaari nind agar mere KHwab mein khul jae

main is umid pe binai KHarch kar raha hun

kisi ka chehra kisi ki naqab mein khul jae

yahi du'a hai ki har shaKHs bolna sikhe

ki jo habab ho ab ke 'azab mein khul jae