dua salam nahin nama-o-payam nahin

duā salām nahīñ nāma-o-payām nahīñ

kuchh apne chāhne vāloñ se un ko kaam nahīñ

vo kyā thī shām-e-judā.ī na pūchh lagtā thā

ki āḳhirī to kahīñ zindagī kī shaam nahīñ

jo ġhair jaisā ho vo kis liye hamārā ho

jo itnā apnā lage kyoñ hamāre naam nahīñ

kisī ġhazāl ke pīchhe bhaTaktā hogā kahīñ

subuktagīn kā mere kahīñ qayām nahīñ

kushāda dil hai tirā ham bhī paḌ raheñge kahīñ

rahe base koī kuchh is se ham ko kaam nahīñ

miyāñ kahāñ chale aate ho muñh uThā.e ruko

ye zindagī hai mirī shāhrāh-e-ām nahīñ

kitāb Daal dī kuuḌe meñ merī ye kah ke

qasīda-goyoñ meñ mere tirā to naam nahīñ

dua salam nahin nama-o-payam nahin

kuchh apne chahne walon se un ko kaam nahin

wo kya thi sham-e-judai na puchh lagta tha

ki aaKHiri to kahin zindagi ki sham nahin

jo ghair jaisa ho wo kis liye hamara ho

jo itna apna lage kyon hamare nam nahin

kisi ghazal ke pichhe bhaTakta hoga kahin

subuktagin ka mere kahin qayam nahin

kushada dil hai tera hum bhi paD rahenge kahin

rahe base koi kuchh is se hum ko kaam nahin

miyan kahan chale aate ho munh uThae ruko

ye zindagi hai meri shahrah-e-am nahin

kitab Dal di kuDe mein meri ye kah ke

qasida-goyon mein mere tera to nam nahin