duaen de ke jo dushnam lete rahte hain

duā.eñ de ke jo dushnām lete rahte haiñ

vo jaam dete haiñ aur jaam lete rahte haiñ

ḳhafā na ho ki hamārā qusūr koī nahīñ

bilā-irāda tirā naam lete rahte haiñ

hujūm-e-ġham meñ tirā naam bhuul bhī jaa.e

to phir bhī jaise tirā naam lete rahte haiñ

ye naam aisā hai bilkul hī gar na leñ us ko

to phir bhī ham sahar-o-shām lete rahte haiñ

tirī nigāh kā kyā qarz ham utāreñge

tirī nazar se baḌe kaam lete rahte haiñ

maiñ vo musāfir-e-raushan-ḳhayāl huuñ yaaro

jo rāste meñ bhī ārām lete rahte haiñ

ġham-e-hayāt kī ta.alīm-o-tarbiyat ke liye

tirī nigāh ke ahkām lete rahte haiñ

paḌī hai yuuñ hameñ bad-nāmiyoñ kī chaaT 'adam'

ki muskurā ke har ilzām lete rahte haiñ

duaen de ke jo dushnam lete rahte hain

wo jam dete hain aur jam lete rahte hain

KHafa na ho ki hamara qusur koi nahin

bila-irada tera nam lete rahte hain

hujum-e-gham mein tera nam bhul bhi jae

to phir bhi jaise tera nam lete rahte hain

ye nam aisa hai bilkul hi gar na len us ko

to phir bhi hum sahar-o-sham lete rahte hain

teri nigah ka kya qarz hum utarenge

teri nazar se baDe kaam lete rahte hain

main wo musafir-e-raushan-KHayal hun yaro

jo raste mein bhi aaram lete rahte hain

gham-e-hayat ki talim-o-tarbiyat ke liye

teri nigah ke ahkaam lete rahte hain

paDi hai yun hamein bad-namiyon ki chaT 'adam'

ki muskura ke har ilzam lete rahte hain