dukh to dukh the jo idhar bahr-e-aman aa nikle

dukh to dukh the jo idhar bahr-e-amāñ aa nikle

aap is dil ke ḳharābe meñ kahāñ aa nikle

ik zarā nikle to āvāz dabā deñ apnī

kyā kareñ chup kā agar us kī zabāñ aa nikle

jaane kab qahqahe ronā paḌeñ ahbāb ke saath

jaane atrāf meñ kab shahr-e-fuġhāñ aa nikle

kuchh to dil-jūī chale dhūp-numā ḳhvāhish kī

dasht meñ tazkira-e-abr-e-ravāñ aa nikle

mere qadmoñ se kare jūñhī masāfat āġhāz

zād-e-rah meñ se usī vaqt ziyāñ aa nikle

dekhte dekhte sūraj kā lahū shaam huī

shab ke ālām the jitne bhī ba-jāñ aa nikle

apne sahrā se bañdhe pyaas ke maare hue ham

muntazir haiñ ki idhar koī kuaañ aa nikle

kyā maiñ phir bhī na karūñ aag sulagne kā gumāñ

jab mirī saañs kī naalī meñ dhuāñ aa nikle

aa.ine bech ke ab chalte bano 'ḳhāvar' tum

is se pahle ki koī sañg-e-girāñ aa nikle

dukh to dukh the jo idhar bahr-e-aman aa nikle

aap is dil ke KHarabe mein kahan aa nikle

ek zara nikle to aawaz daba den apni

kya karen chup ka agar us ki zaban aa nikle

jaane kab qahqahe rona paDen ahbab ke sath

jaane atraf mein kab shahr-e-fughan aa nikle

kuchh to dil-jui chale dhup-numa KHwahish ki

dasht mein tazkira-e-abr-e-rawan aa nikle

mere qadmon se kare junhi masafat aaghaz

zad-e-rah mein se usi waqt ziyan aa nikle

dekhte dekhte suraj ka lahu sham hui

shab ke aalam the jitne bhi ba-jaan aa nikle

apne sahra se bandhe pyas ke mare hue hum

muntazir hain ki idhar koi kuan aa nikle

kya main phir bhi na karun aag sulagne ka guman

jab meri sans ki nali mein dhuan aa nikle

aaine bech ke ab chalte bano 'KHawar' tum

is se pahle ki koi sang-e-giran aa nikle