dukhon ke dasht ghamon ke nagar mein chhoD aae

dukhoñ ke dasht ġhamoñ ke nagar meñ chhoḌ aa.e

vo ham-safar ki jinheñ ham-safar meñ chhoḌ aa.e

bahut jamīl sī yādoñ ko saath le aa.e

bahut malūl se chehroñ ko ghar meñ chhoḌ aa.e

baḌe qarīne se ham aa ga.e kināre par

baḌe salīqe se kashtī bhañvar meñ chhoḌ aa.e

kis ehtimām se ab tak pukārtī haiñ hameñ

vo chāhateñ jinheñ dīvār-o-dar meñ chhoḌ aa.e

bahut ajiib the vo log jo dam-e-ruḳhsat

ka.ī kahāniyāñ us chashm-e-tar meñ chhoḌ aa.e

na din hī phirte haiñ 'mohsin' na shab badaltī hai

vatan ko kaun se shām-o-sahar meñ chhoḌ aa.e

dukhon ke dasht ghamon ke nagar mein chhoD aae

wo ham-safar ki jinhen ham-safar mein chhoD aae

bahut jamil si yaadon ko sath le aae

bahut malul se chehron ko ghar mein chhoD aae

baDe qarine se hum aa gae kinare par

baDe saliqe se kashti bhanwar mein chhoD aae

kis ehtimam se ab tak pukarti hain hamein

wo chahaten jinhen diwar-o-dar mein chhoD aae

bahut ajib the wo log jo dam-e-ruKHsat

kai kahaniyan us chashm-e-tar mein chhoD aae

na din hi phirte hain 'mohsin' na shab badalti hai

watan ko kaun se sham-o-sahar mein chhoD aae