duKHtar-e-raz se mulaqat hui hai ki nahin

duḳhtar-e-raz se mulāqāt huī hai ki nahīñ

sach batā de are zāhid kabhī pī hai ki nahīñ

mast saaqī kī nigāhoñ se haiñ piine vaale

is kī parvā nahīñ shīshe kī parī hai ki nahīñ

mast sab uTh ga.e pī kar tire maiḳhāne se

are saaqī mire hisse kī bachī hai ki nahīñ

parda-e-arsh meñ to aap chhupe baiThe haiñ

muttahim maiñ ki mujhe dīda-varī hai ki nahīñ

un ke ghar jaate ho to soch samajh kar jaao

dekh lo pahle vahāñ ġhair koī hai ki nahīñ

merī barbādī-e-dil dekh ke hañsne vaale

kyā tire husn kī daulat bhī luTī hai ki nahīñ

kuchh haqīqat bhī hai yā 'zabt' faqat naam ke ho

sach batāo ki hasīnoñ se nibhī hai ki nahīñ

duKHtar-e-raz se mulaqat hui hai ki nahin

sach bata de are zahid kabhi pi hai ki nahin

mast saqi ki nigahon se hain pine wale

is ki parwa nahin shishe ki pari hai ki nahin

mast sab uTh gae pi kar tere maiKHane se

are saqi mere hisse ki bachi hai ki nahin

parda-e-arsh mein to aap chhupe baiThe hain

muttahim main ki mujhe dida-wari hai ki nahin

un ke ghar jate ho to soch samajh kar jao

dekh lo pahle wahan ghair koi hai ki nahin

meri barbaadi-e-dil dekh ke hansne wale

kya tere husn ki daulat bhi luTi hai ki nahin

kuchh haqiqat bhi hai ya 'zabt' faqat nam ke ho

sach batao ki hasinon se nibhi hai ki nahin