duniya-dari se na-waqif kaisa pagal laDka tha

duniyā-dārī se nā-vāqif kaisā pāgal laḌkā thā

jab rone kā mauqa hotā tab bhī hañstā rahtā thā

ham se kaisī bhuul huī thī ham ne kyā kyā sochā thā

bilkul mom sā pighlā vo to jo kundan sā lagtā thā

shak ke saa.e phail rahe haiñ bastī vaale hairāñ haiñ

us ne dariyā paar kiyā hai to kyā maTkā pakkā thā

zehn meñ dhuñdlā dhuñdlā sā ik naqsh ubhartā jaatā hai

ham tum ko pahchān rahe haiñ ham ne tum ko dekhā thā

pahle kuchh sochā hī nahīñ thā lekin ab is soch meñ haiñ

mil kar bhī kyā paayā tum se milte nahīñ to achchhā thā

vo jo ik ummīd thī tum se ḳhair use ab chhoḌo tum

tum par kyā ilzām dhareñ ham yuuñ bhī ye to honā thā

duniya-dari se na-waqif kaisa pagal laDka tha

jab rone ka mauqa hota tab bhi hansta rahta tha

hum se kaisi bhul hui thi hum ne kya kya socha tha

bilkul mom sa pighla wo to jo kundan sa lagta tha

shak ke sae phail rahe hain basti wale hairan hain

us ne dariya par kiya hai to kya maTka pakka tha

zehn mein dhundla dhundla sa ek naqsh ubharta jata hai

hum tum ko pahchan rahe hain hum ne tum ko dekha tha

pahle kuchh socha hi nahin tha lekin ab is soch mein hain

mil kar bhi kya paya tum se milte nahin to achchha tha

wo jo ek ummid thi tum se KHair use ab chhoDo tum

tum par kya ilzam dharen hum yun bhi ye to hona tha