duniya-e-gham ko zer-o-zabar kar sake to kar

duniyā-e-ġham ko zer-o-zabar kar sake to kar

rahmat kī mujh pe ek nazar kar sake to kar

ai dil tū aisī aah agar kar sake to kar

duniyā udhar kī aaj idhar kar sake to kar

ai āh-e-barq-rez tujhe roktā hai kaun

us be-ḳhabar ko merī ḳhabar kar sake to kar

mash.hūr hai ki ishq kī rāheñ haiñ ḳhaufnāk

himmat se pahle pūchh safar kar sake to kar

aariz haiñ tere zulfeñ bhī terī kisī se kyā

ik jā pe jam.a shām-o-sahar kar sake to kar

nādāñ hadīs-e-ishq ke ma.anī kuchh aur haiñ

qaabū meñ dil ko apne agar kar sake to kar

ai aah tū hī hausla apnā nikāl le

us sañg-dil ke dil pe asar kar sake to kar

'ālim' jahān-e-ishq ki dushvāriyāñ na pūchh

dil ko jo rāzdār-e-jigar kar sake to kar

duniya-e-gham ko zer-o-zabar kar sake to kar

rahmat ki mujh pe ek nazar kar sake to kar

ai dil tu aisi aah agar kar sake to kar

duniya udhar ki aaj idhar kar sake to kar

ai aah-e-barq-rez tujhe rokta hai kaun

us be-KHabar ko meri KHabar kar sake to kar

mashhur hai ki ishq ki rahen hain KHaufnak

himmat se pahle puchh safar kar sake to kar

aariz hain tere zulfen bhi teri kisi se kya

ek ja pe jama sham-o-sahar kar sake to kar

nadan hadis-e-ishq ke mani kuchh aur hain

qabu mein dil ko apne agar kar sake to kar

ai aah tu hi hausla apna nikal le

us sang-dil ke dil pe asar kar sake to kar

'alim' jahan-e-ishq ki dushwariyan na puchh

dil ko jo raazdar-e-jigar kar sake to kar