duniyā-e-sitam zer-o-zabar ho ke rahegī
jab raat huī hai to sahar ho ke rahegī
talvār se jaage ki nasīm-e-saharī se
hushiyār magar rūh-e-bashar ho ke rahegī
ban jā.eñge gul raah meñ bikhre hue kāñTe
himmat hai to takmīl-e-safar ho ke rahegī
ye husn-e-tasavvur mujhe marne nahīñ detā
ik din mirī jānib vo nazar ho ke rahegī
tum ḳhūn-e-tamannā ko mire laakh chhupāo
ik roz zamāne ko ḳhabar ho ke rahegī
ye baat alag hai ki sahar tak na raheñ ham
lekin ye yaqīñ hai ki sahar ho ke rahegī
'shārib' maiñ chhupūñ laakh zamāne kī nazar se
lekin ḳhabar-e-aib-o-hunar ho ke rahegī
duniya-e-sitam zer-o-zabar ho ke rahegi
jab raat hui hai to sahar ho ke rahegi
talwar se jage ki nasim-e-sahari se
hushiyar magar ruh-e-bashar ho ke rahegi
ban jaenge gul rah mein bikhre hue kanTe
himmat hai to takmil-e-safar ho ke rahegi
ye husn-e-tasawwur mujhe marne nahin deta
ek din meri jaanib wo nazar ho ke rahegi
tum KHun-e-tamanna ko mere lakh chhupao
ek roz zamane ko KHabar ho ke rahegi
ye baat alag hai ki sahar tak na rahen hum
lekin ye yaqin hai ki sahar ho ke rahegi
'shaarib' main chhupun lakh zamane ki nazar se
lekin KHabar-e-aib-o-hunar ho ke rahegi
Source:
Firdaus-e-Nazar (Pg. 132)
-
Author:
Sultan Haider Khan
-
- Publisher: Urdu Acadami U.P
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.