duniya hi ki rah pe aaKHir rafta rafta aana hoga

duniyā hī kī raah pe āḳhir rafta rafta aanā hogā

dard bhī degā saath kahāñ tak be-dil hī ban jaanā hogā

hairat kyā hai ham se baḌh kar kaun bhalā begāna hogā

ḳhud apne ko bhuul chuke haiñ tum ne kyā pahchānā hogā

dil kā Thikānā DhūñDh liyā hai aur kahāñ ab jaanā hogā

ham hoñge aur vahshat hogī aur yahī vīrāna hogā

biit gayā jo yaad meñ terī ik ik lamhe kā hai dhyān

ulfat meñ jī hārnā kaisā jo khoyā sab paanā hogā

aur to sab dukh baT jaate haiñ dil ke dard ko kaun baTā.e

duniyā ke ġham bar-haq lekin apnā bhī ġham khānā hogā

dil meñ hujūm-e-dard hai lekin aah ke bhī ausān nahīñ

is badlī ko yūñhī āḳhir bin barse chhaT jaanā hogā

ham to fasāna kah kar apne dil kā bojh utaar chale

tum jo kahoge apne dil se vo kaisā afsāna hogā

is bastī kā kaun masīhā is bastī kā kaun ḳhudā

ḳhud hī hashr uThāne hoñge marnā aur jī jaanā hogā

duniya hi ki rah pe aaKHir rafta rafta aana hoga

dard bhi dega sath kahan tak be-dil hi ban jaana hoga

hairat kya hai hum se baDh kar kaun bhala begana hoga

KHud apne ko bhul chuke hain tum ne kya pahchana hoga

dil ka Thikana DhunDh liya hai aur kahan ab jaana hoga

hum honge aur wahshat hogi aur yahi virana hoga

bit gaya jo yaad mein teri ek ek lamhe ka hai dhyan

ulfat mein ji haarna kaisa jo khoya sab pana hoga

aur to sab dukh baT jate hain dil ke dard ko kaun baTae

duniya ke gham bar-haq lekin apna bhi gham khana hoga

dil mein hujum-e-dard hai lekin aah ke bhi ausan nahin

is badli ko yunhi aaKHir bin barse chhaT jaana hoga

hum to fasana kah kar apne dil ka bojh utar chale

tum jo kahoge apne dil se wo kaisa afsana hoga

is basti ka kaun masiha is basti ka kaun KHuda

KHud hi hashr uThane honge marna aur ji jaana hoga