duniya ki kashakash mein phans kar dil-e-gham se bachana paDta hai

duniyā kī kashākash meñ phañs kar dil-e-ġham se bachānā paḌtā hai

murjhā.ī huī kaliyoñ ko yahāñ hañs hañs ke khilānā paḌtā hai

yuuñ apnī tamannā muztar hai yuuñ apnī mohabbat vīrāñ hai

kāñTe se bichhe haiñ har jānib palkoñ se uThānā paḌtā hai

kyā aalam hai behosh meñ bhī vā ahl-e-nazar kī nazreñ haiñ

mahfil meñ kisī ke dāman se dāman ko bachānā paḌtā hai

jab chāñdnī shab meñ yaad kisī zālim kī nahīñ jiine detī

phir rāz-e-mohabbat ghabrā kar tāroñ se batānā paḌtā hai

yuuñ dard kī Tīseñ uThtī haiñ yuuñ sabr kā dāmāñ chhuTtā hai

maazī kā fasāna phir dil se Dar Dar ke bhulānā paḌtā hai

kis tanz se vo farmāte haiñ kyā sahl hai ulfat kī manzil

yaañ jaan gañvānī paḌtī hai yaañ ashk bahānā paḌtā hai

mañjdhār meñ apne hāthoñ se 'tasnīm' Dubo kar aah yahāñ

nākām mohabbat kashtī ko phir paar lagānā paḌtā hai

duniya ki kashakash mein phans kar dil-e-gham se bachana paDta hai

murjhai hui kaliyon ko yahan hans hans ke khilana paDta hai

yun apni tamanna muztar hai yun apni mohabbat viran hai

kanTe se bichhe hain har jaanib palkon se uThana paDta hai

kya aalam hai behosh mein bhi wa ahl-e-nazar ki nazren hain

mahfil mein kisi ke daman se daman ko bachana paDta hai

jab chandni shab mein yaad kisi zalim ki nahin jine deti

phir raaz-e-mohabbat ghabra kar taron se batana paDta hai

yun dard ki Tisen uThti hain yun sabr ka daman chhuTta hai

mazi ka fasana phir dil se Dar Dar ke bhulana paDta hai

kis tanz se wo farmate hain kya sahl hai ulfat ki manzil

yan jaan ganwani paDti hai yan ashk bahana paDta hai

manjdhaar mein apne hathon se 'tasnim' Dubo kar aah yahan

nakaam mohabbat kashti ko phir par lagana paDta hai