duniya kuchh is tariqe se sadme mein aa gai

duniyā kuchh is tarīqe se sadme meñ aa ga.ī

jaise simaT ke ik sadī lamhe meñ aa ga.ī

koī gale bhī miltā na ho jab kisī se aaj

kuchh baat hai jo bhiiḌ janāze meñ aa ga.ī

ā.īne dekhne kā hunar jab se chhin gayā

patthar kī har sifat mire chehre meñ aa ga.ī

vo nasl kyā uThā.egī ab zindagī kā bojh

bachpan se hī jo sīdhe buḌhāpe meñ aa ga.ī

phūloñ sī ik zabān se rishta to hai magar

kitnī karaḳhtagī mire lahje meñ aa ga.ī

allah kā karam hī samajhiyegā āj-kal

koī sifat jo baap kī beTe meñ aa ga.ī

'shāhid' pe mehrbāñ jo huī hai kabhī ġhazal

dahlīz se uThī to darīche meñ aa ga.ī

duniya kuchh is tariqe se sadme mein aa gai

jaise simaT ke ek sadi lamhe mein aa gai

koi gale bhi milta na ho jab kisi se aaj

kuchh baat hai jo bhiD janaze mein aa gai

aaine dekhne ka hunar jab se chhin gaya

patthar ki har sifat mere chehre mein aa gai

wo nasl kya uThaegi ab zindagi ka bojh

bachpan se hi jo sidhe buDhape mein aa gai

phulon si ek zaban se rishta to hai magar

kitni karaKHtagi mere lahje mein aa gai

allah ka karam hi samajhiyega aaj-kal

koi sifat jo bap ki beTe mein aa gai

'shahid' pe mehrban jo hui hai kabhi ghazal

dahliz se uThi to dariche mein aa gai