duniya mein koi dil ka KHaridar na paya

duniyā meñ koī dil kā ḳharīdār na paayā

sab dekhe dil-āzār hī dildār na paayā

kab ġhair ko ham-rah tire ai yaar na dekhā

tujh gul ko kabhī ham ne to be-ḳhār na paayā

tujh ruḳh se na burqā uThā ai ġhairat-e-ḳhurshīd

zarra tirā mushtāqoñ ne dīdār na paayā

ham sar hī paTakte rahe darvāze ke bāhar

par ghar meñ tire aanā kabhī baar na paayā

kis se kahūñ apnā ġham-e-dil aah azīzāñ

duniyā meñ koī mūnis-o-ġham-ḳhvār na paayā

har tarah gale paḌ ke diyā ham ne tujhe dil

jab tujh sā yahāñ koī tarah-dār na paayā

dekh us kī huī aisī ze-ḳhud-raftagī tujh ko

kal aap meñ maiñ tujh ko 'jahāñdār' na paayā

duniya mein koi dil ka KHaridar na paya

sab dekhe dil-azar hi dildar na paya

kab ghair ko ham-rah tere ai yar na dekha

tujh gul ko kabhi hum ne to be-KHar na paya

tujh ruKH se na burqa uTha ai ghairat-e-KHurshid

zarra tera mushtaqon ne didar na paya

hum sar hi paTakte rahe darwaze ke bahar

par ghar mein tere aana kabhi bar na paya

kis se kahun apna gham-e-dil aah azizan

duniya mein koi munis-o-gham-KHwar na paya

har tarah gale paD ke diya hum ne tujhe dil

jab tujh sa yahan koi tarah-dar na paya

dekh us ki hui aisi ze-KHud-raftagi tujh ko

kal aap mein main tujh ko 'jahandar' na paya