duniya sabhi baatil ki talabgar lage hai

duniyā sabhī bātil kī talabgār lage hai

jis ruuh ko dekho vahī bīmār lage hai

jab bhuuk se mar jaatā hai dorāhe pe koī

bastī kā har ik shaḳhs gunahgār lage hai

shāyad na.ī tahzīb kī me.arāj yahī hai

haq-go hī zamāne meñ ḳhatā-kār lage hai

vo terī vafā kī ho ki duniyā kī jafā kī

mat chheḌ koī baat ki talvār lage hai

kyā zarf hai har zulm pe ḳhāmosh hai duniyā

is daur kā insān pur-asrār lage hai

jis ne kabhī dariyā kā talātum nahīñ dekhā

sāhil bhī use duur se mañjhdār lage hai

duniya sabhi baatil ki talabgar lage hai

jis ruh ko dekho wahi bimar lage hai

jab bhuk se mar jata hai dorahe pe koi

basti ka har ek shaKHs gunahgar lage hai

shayad nai tahzib ki mearaj yahi hai

haq-go hi zamane mein KHata-kar lage hai

wo teri wafa ki ho ki duniya ki jafa ki

mat chheD koi baat ki talwar lage hai

kya zarf hai har zulm pe KHamosh hai duniya

is daur ka insan pur-asrar lage hai

jis ne kabhi dariya ka talatum nahin dekha

sahil bhi use dur se manjhdar lage hai