duniya se aql-o-faham ke aasar mar gae

duniyā se aql-o-faham ke āsār mar ga.e

saa.e to jī uThe dar-o-dīvār mar ga.e

kashtī-e-zīst paar na lag paa.ī le ke vo

aql-o-ḳhirad kā haath meñ patvār mar ga.e

jin ko thā ḳhauf maut kā apnī hayāt meñ

ik baar kyā mare vo ka.ī baar mar ga.e

thā imtihān-e-shauq kyā naqd-e-jāñ qubūl

ho kar ḳhushī se ham baḌe sarshār mar ga.e

ḳhushbū uḌā ke laa.e the dāmān-e-yār se

is mudda.ā-e-shauq ke iz.hār mar ga.e

jannat milī na huur gayā ittiqā kahāñ

malte haiñ 'dard' haath ki be-kār mar ga.e

duniya se aql-o-faham ke aasar mar gae

sae to ji uThe dar-o-diwar mar gae

kashti-e-zist par na lag pai le ke wo

aql-o-KHirad ka hath mein patwar mar gae

jin ko tha KHauf maut ka apni hayat mein

ek bar kya mare wo kai bar mar gae

tha imtihan-e-shauq kya naqd-e-jaan qubul

ho kar KHushi se hum baDe sarshaar mar gae

KHushbu uDa ke lae the daman-e-yar se

is muddaa-e-shauq ke izhaar mar gae

jannat mili na hur gaya ittiqa kahan

malte hain 'dard' hath ki be-kar mar gae