duniya se sadgi ka chalan kaun le gaya

duniyā se sādgī kā chalan kaun le gayā

hairat to hai ḳhulūs-e-suḳhan kaun le gayā

yārān-e-ḳhush-adā se zarā pūchhte chaleñ

mausam kā rang husn-e-chaman kaun le gayā

vo jis kī raushnī meñ thā maazī kā nuur bhī

ai dost vo charāġh-e-kuhan kaun le gayā

ādāb-o-guftugū meñ matānat vahī rahī

sher-o-adab se nudrat-e-fan kaun le gayā

shabnam kī hī ḳhatā na havāoñ kā hai qusūr

phūloñ ke pairahan se shikan kaun le gayā

halkā sā thā na abr kā saaya koī vahāñ

sūraj ke bhī nagar se kiran kaun le gayā

kahiye to mujh ko tez-ravī kis ne baḳhsh dī

'anvar' mire safar kī thakan kaun le gayā

duniya se sadgi ka chalan kaun le gaya

hairat to hai KHulus-e-suKHan kaun le gaya

yaran-e-KHush-ada se zara puchhte chalen

mausam ka rang husn-e-chaman kaun le gaya

wo jis ki raushni mein tha mazi ka nur bhi

ai dost wo charagh-e-kuhan kaun le gaya

aadab-o-guftugu mein matanat wahi rahi

sher-o-adab se nudrat-e-fan kaun le gaya

shabnam ki hi KHata na hawaon ka hai qusur

phulon ke pairahan se shikan kaun le gaya

halka sa tha na abr ka saya koi wahan

suraj ke bhi nagar se kiran kaun le gaya

kahiye to mujh ko tez-rawi kis ne baKHsh di

'anwar' mere safar ki thakan kaun le gaya