duniya tamam luT rahi hai bahaar-e-id

duniyā tamām luuT rahī hai bahār-e-īd

lekin hameñ to aaj bhī hai intizār-e-eid

har zarra ashk-bār hai maazī kī yaad meñ

hai iid bhī bajā-e-ḳhud ik yādgār-e-īd

ham āsmāñ pe chāñd kā nazzāra kyā kareñ

abrū ko un ke dekheñ to ho e'tibār-e-īd

ab ke siyāh-ḳhāne meñ baiThe guzār dī

allāh ham ko yaad rahegī bahār-e-īd

hai ghar kā ek gosha maiñ huuñ yād-e-yār hai

har dāġh-e-dil banā hai charāġh-e-mazār-e-īd

'sā.ib' gale kā haar huī ab ke muflisī

kuchh kam nahīñ ḳhizān-e-alam se bahār-e-īd

duniya tamam luT rahi hai bahaar-e-id

lekin hamein to aaj bhi hai intizar-e-eid

har zarra ashk-bar hai mazi ki yaad mein

hai id bhi baja-e-KHud ek yaadgar-e-id

hum aasman pe chand ka nazzara kya karen

abru ko un ke dekhen to ho e'tibar-e-id

ab ke siyah-KHane mein baiThe guzar di

allah hum ko yaad rahegi bahaar-e-id

hai ghar ka ek gosha main hun yaad-e-yar hai

har dagh-e-dil bana hai charagh-e-mazar-e-id

'saib' gale ka haar hui ab ke muflisi

kuchh kam nahin KHizan-e-alam se bahaar-e-id