duniya tere matlab ki hai tu duniya ke matlab ka

duniyā tere matlab kī hai tū duniyā ke matlab kā

aur donoñ ke paas nahīñ hai kuchh bhī mere matlab kā

aslī baat pe kyā phal aatā hāhā-kār ke mausam meñ

sab ne baaġh lagā rakkhā hai apne apne matlab kā

apnī hī āvāz pe laTTū ho kar ibn-e-ādam ne

kaisā kaisā lafz banāyā kaise kaise matlab kā

rishtoñ kī ta.amīr meñ koī dar to rakhnā paḌtā hai

chhoTī chhoTī ummīdoñ kā halke-phulke matlab kā

baat barā.e baat kā ḳhālis lutf uThā.eñ aaj zarā

thoḌī der bhulā do jhagḌā ulTe-sīdhe matlab kā

donoñ par be-laus mohabbat kī ik chhatrī kaafī thī

tum ne sar par kyā taanā hai dohre tihre matlab kā

mere dil ko giit banā kar gaao lekin yaad rahe

is par koī harf na aa.e aise vaise matlab kā

chhoTā sā ik jumla sun kar din achchhā ho jaatā hai

lekin tere lab se nikle aur ho achchhe matlab kā

ek añgūThī ghaḌ lo biibī roz sadā.eñ detā hai

duur kahīñ ik siipī andar motī gahre matlab kā

duniya tere matlab ki hai tu duniya ke matlab ka

aur donon ke pas nahin hai kuchh bhi mere matlab ka

asli baat pe kya phal aata haha-kar ke mausam mein

sab ne bagh laga rakkha hai apne apne matlab ka

apni hi aawaz pe laTTu ho kar ibn-e-adam ne

kaisa kaisa lafz banaya kaise kaise matlab ka

rishton ki tamir mein koi dar to rakhna paDta hai

chhoTi chhoTi ummidon ka halke-phulke matlab ka

baat barae baat ka KHalis lutf uThaen aaj zara

thoDi der bhula do jhagDa ulTe-sidhe matlab ka

donon par be-laus mohabbat ki ek chhatri kafi thi

tum ne sar par kya tana hai dohre tihre matlab ka

mere dil ko git bana kar gao lekin yaad rahe

is par koi harf na aae aise waise matlab ka

chhoTa sa ek jumla sun kar din achchha ho jata hai

lekin tere lab se nikle aur ho achchhe matlab ka

ek anguThi ghaD lo bibi roz sadaen deta hai

dur kahin ek sipi andar moti gahre matlab ka