dushman-e-jaan bhi wahi hasil-e-arman bhi wahi

dushman-e-jāñ bhī vahī hāsil-e-armāñ bhī vahī

ġham kā sāmāñ bhī vahī dard kā darmāñ bhī vahī

lutf-e-gul-gasht magar ab vo kahāñ tere baġhair

rang-e-gulshan hai vahī josh-e-bahārāñ bhī vahī

ba.ad dīvāne ke aglī sī vo raunaq na rahī

bazm-e-ḳhūbāñ hai vahī shahr-e-nigārāñ bhī vahī

aaj tak ātish-e-ġham jān-e-jahāñ kam na huī

zaḳhm haiñ ab bhī vahī sozish-e-pinhāñ bhī vahī

ḳhanda-bar-lab jo the hangām atā-e-ġham-e-dil

jaane kyā guzrī nazar aa.e pashemāñ bhī vahī

Duubā jaatā hai ye kyuuñ aaj dil-e-zār 'shakeb'

bazm-e-ahbāb vahī aish ke sāmāñ bhī vahī

dushman-e-jaan bhi wahi hasil-e-arman bhi wahi

gham ka saman bhi wahi dard ka darman bhi wahi

lutf-e-gul-gasht magar ab wo kahan tere baghair

rang-e-gulshan hai wahi josh-e-bahaaran bhi wahi

baad diwane ke agli si wo raunaq na rahi

bazm-e-KHuban hai wahi shahr-e-nigaran bhi wahi

aaj tak aatish-e-gham jaan-e-jahan kam na hui

zaKHm hain ab bhi wahi sozish-e-pinhan bhi wahi

KHanda-bar-lab jo the hangam ata-e-gham-e-dil

jaane kya guzri nazar aae pasheman bhi wahi

Duba jata hai ye kyun aaj dil-e-zar 'shakeb'

bazm-e-ahbab wahi aish ke saman bhi wahi