dushman nahin ki kuchh na kaho mujhko dosto

dushman nahīñ ki kuchh na kaho mujh ko dosto

kyoñ mere muñh pe chup ho kaho kuchh to dosto

merī nazar kā aa.ina sūrat-shanās hai

merī nazar ke sāmne aao to dosto

fasl-e-bahār aane se pahle kī baat hai

ham bhī tumhāre saath the pahchāno dosto

muddat guzar ga.ī hai bayābān-o-dasht meñ

kāñTā sahī chaman meñ bulāo to dosto

jin bādaloñ meñ rang-e-shafaq tairne lage

phir us se kis karam kī tamannā ho dosto

kyā hīlā-sāz fitrat-e-duniyā kā e'tibār

dekhā hai ham ne vaqt kī āñkhoñ ko dosto

āvāz-e-bāzgasht-e-talātum hai zindagī

dariyā meñ rah ke mauj se Darte ho dosto

marham nahīñ nahīñ na sahī neshtar sahī

koī to zaḳhm-e-dil kā mudāvā ho dosto

sūrat-shanās aa.ine dhuñdlā ke rah ga.e

chehroñ se gard-e-vaqt haTāo to dosto

'sīmā' ke zehn-o-dil meñ rahegī tumhārī yaad

maqtūl bhūltā nahīñ qātil ko dosto

dushman nahin ki kuchh na kaho mujh ko dosto

kyon mere munh pe chup ho kaho kuchh to dosto

meri nazar ka aaina surat-shanas hai

meri nazar ke samne aao to dosto

fasl-e-bahaar aane se pahle ki baat hai

hum bhi tumhaare sath the pahchano dosto

muddat guzar gai hai bayaban-o-dasht mein

kanTa sahi chaman mein bulao to dosto

jin baadalon mein rang-e-shafaq tairne lage

phir us se kis karam ki tamanna ho dosto

kya hila-saz fitrat-e-duniya ka e'tibar

dekha hai hum ne waqt ki aankhon ko dosto

aawaz-e-bazgasht-e-talatum hai zindagi

dariya mein rah ke mauj se Darte ho dosto

marham nahin nahin na sahi neshtar sahi

koi to zaKHm-e-dil ka mudawa ho dosto

surat-shanas aaine dhundla ke rah gae

chehron se gard-e-waqt haTao to dosto

'sima' ke zehn-o-dil mein rahegi tumhaari yaad

maqtul bhulta nahin qatil ko dosto