dur-andesh marizon ki ye aadat dekhi

dūr-andesh marīzoñ kī ye aadat dekhī

har taraf dekh liyā jab tirī sūrat dekhī

aa.e aur ik nigah-e-ḳhās se phir dekh ga.e

jabki aate hue bīmār meñ tāqat dekhī

quvvateñ zabt kī har chand sambhāle thiiñ mujhe

phir bhī Darte hue maiñ ne tirī sūrat dekhī

mahfil-e-hashr meñ ye kaun hai mīr-e-majlis

ye to ham ne koī dekhī huī sūrat dekhī

sab ye kahte haiñ use ab koī āzār nahīñ

kyuuñ sitamgār mire zabt kī quvvat dekhī

sone vāloñ pe na chamkā kabhī nūr-e-saharī

rone vāloñ hī ke chehroñ pe sabāhat dekhī

is qadar yaas bhī hotī hai kahīñ duniyā meñ

ro diye ham jo tirī chashm-e-ināyat dekhī

mujh ko ta.alīm se fursat hī kahāñ ai 'shabbīr'

kah liyā sher koī jab kabhī fursat dekhī

dur-andesh marizon ki ye aadat dekhi

har taraf dekh liya jab teri surat dekhi

aae aur ek nigah-e-KHas se phir dekh gae

jabki aate hue bimar mein taqat dekhi

quwwaten zabt ki har chand sambhaale thin mujhe

phir bhi Darte hue main ne teri surat dekhi

mahfil-e-hashr mein ye kaun hai mir-e-majlis

ye to hum ne koi dekhi hui surat dekhi

sab ye kahte hain use ab koi aazar nahin

kyun sitamgar mere zabt ki quwwat dekhi

sone walon pe na chamka kabhi nur-e-sahari

rone walon hi ke chehron pe sabahat dekhi

is qadar yas bhi hoti hai kahin duniya mein

ro diye hum jo teri chashm-e-inayat dekhi

mujh ko talim se fursat hi kahan ai 'shabbir'

kah liya sher koi jab kabhi fursat dekhi