dur bhi jate hue pas bhi aate hue hum

duur bhī jaate hue paas bhī aate hue ham

bhūlte bhūlte kuchh yaad dilāte hue ham

niiñd kā is ko nasha ham ko jagāne kī havas

ḳhvāb meñ aate hue niiñd churāte hue ham

pahle rote hue apnī hī nigahbānī meñ

aur be-sāḳhta phir ḳhud ko hañsāte hue ham

pichhlī shab poñchhte āñkhoñ se purāne sabhī ḳhvāb

aglī shab ḳhvāboñ kā ambār lagāte hue ham

chāragar bante hue apnī hī vīrānī meñ

pahlī bārish meñ akele hī nahāte hue ham

ḳhuun armānoñ kā karte hue ḳhāmoshī se

aur phir ḳhuun ko āñkhoñ meñ chhupāte hue ham

apnī jholī meñ kisī jiit kā nashsha sā liye

us ke kūche se 'ziyā' haar ke jaate hue haiñ ham

dur bhi jate hue pas bhi aate hue hum

bhulte bhulte kuchh yaad dilate hue hum

nind ka is ko nasha hum ko jagane ki hawas

KHwab mein aate hue nind churaate hue hum

pahle rote hue apni hi nigahbani mein

aur be-saKHta phir KHud ko hansate hue hum

pichhli shab ponchhte aankhon se purane sabhi KHwab

agli shab KHwabon ka ambar lagate hue hum

chaaragar bante hue apni hi virani mein

pahli barish mein akele hi nahate hue hum

KHun armanon ka karte hue KHamoshi se

aur phir KHun ko aankhon mein chhupate hue hum

apni jholi mein kisi jit ka nashsha sa liye

us ke kuche se 'ziya' haar ke jate hue hain hum