dur ke ek nazare se nikal kar aai

duur ke ek nazāre se nikal kar aa.ī

raushnī mujh meñ sitāre se nikal kar aa.ī

jis ne kashtī ko Duboyā sar-o-sāmān samet

vo ghanī mauj kināre se nikal kar aa.ī

raakh jhāḌī jo badan kī to achānak bāhar

aag hī aag sharāre se nikal kar aa.ī

peḌ mab.hūt hue dekh ke is manzar ko

dhuup jab us ke ishāre se nikal kar aa.ī

aañkh meñ ashk riyāzat se huā hai paidā

ye namī vaqt ke dhāre se nikal kar aa.ī

kaun takiya kare mahtāb kī us raushnī par

sāmne bhī jo sahāre se nikal kar aa.ī

ḳhud bhī hairān huuñ ye soch ke 'āzar' ab tak

zindagī kaise ḳhasāre se nikal kar aa.ī

dur ke ek nazare se nikal kar aai

raushni mujh mein sitare se nikal kar aai

jis ne kashti ko Duboya sar-o-saman samet

wo ghani mauj kinare se nikal kar aai

rakh jhaDi jo badan ki to achanak bahar

aag hi aag sharare se nikal kar aai

peD mabhut hue dekh ke is manzar ko

dhup jab us ke ishaare se nikal kar aai

aankh mein ashk riyazat se hua hai paida

ye nami waqt ke dhaare se nikal kar aai

kaun takiya kare mahtab ki us raushni par

samne bhi jo sahaare se nikal kar aai

KHud bhi hairan hun ye soch ke 'azar' ab tak

zindagi kaise KHasare se nikal kar aai