dur ke jalwon ki shadabi ka dil-dada na ho

duur ke jalvoñ kī shādābī kā dil-dāda na ho

tū jise dariyā samajhtā hai kahīñ sahrā na ho

aa.ine ko ek muddat ho ga.ī dekhe hue

vo jabīn-e-shauq jis par soch kā saaya na ho

vo bhī mere paas se guzrā usī andāz se

maiñ ne bhī zāhir kiyā jaise use dekhā na ho

is taraf kyā turfa aalam hai ye khul saktā nahīñ

aadmī kā qad agar dīvār se ūñchā na ho

maslahat chāhe rahūñ Daale tasanño kā naqāb

dostī kī maañg chehre par koī parda na ho

dhuup se ghabrā ke baiThā to hai lekin dekh le

ye kisī girtī huī dīvār kā saaya na ho

qahqahoñ kī chhāñv meñ ik shaḳhs baiThā hai udaas

vo bhī merī hī tarah is bhiiḌ meñ tanhā na ho

'sābir' in mānūs galiyoñ se to dil uktā gayā

aa chaleñ is shahr meñ pahle jaise dekhā na ho

dur ke jalwon ki shadabi ka dil-dada na ho

tu jise dariya samajhta hai kahin sahra na ho

aaine ko ek muddat ho gai dekhe hue

wo jabin-e-shauq jis par soch ka saya na ho

wo bhi mere pas se guzra usi andaz se

main ne bhi zahir kiya jaise use dekha na ho

is taraf kya turfa aalam hai ye khul sakta nahin

aadmi ka qad agar diwar se uncha na ho

maslahat chahe rahun Dale tasanno ka naqab

dosti ki mang chehre par koi parda na ho

dhup se ghabra ke baiTha to hai lekin dekh le

ye kisi girti hui diwar ka saya na ho

qahqahon ki chhanw mein ek shaKHs baiTha hai udas

wo bhi meri hi tarah is bhiD mein tanha na ho

'sabir' in manus galiyon se to dil ukta gaya

aa chalen is shahr mein pahle jaise dekha na ho