ek aalam usko rota hi raha

ek aalam us ko rotā hī rahā

'akbar' apnī niiñd sotā hī rahā

maiñ na samjhā sard-o-garm-e-rozgār

umr bhar in ko samotā hī rahā

mere armānoñ kī kasrat dekhnā

āsmāñ ko uzr hotā hī rahā

nafā aur nuqsān-e-hastī kyā batā.ūñ

is qadar paayā ki khotā hī rahā

mere dil meñ un ke mizhgāñ kā ḳhayāl

ek barchhī sī chubhotā hī rahā

hirs-e-jannat din-ba-din baḌhtī ga.ī

muft zāhid umr khotā hī rahā

ham umīd-e-vasl par jiite rahe

ahd puurā un kā hotā hī rahā

kūcha-e-saffāk kab ḳhālī rahā

ik na ik kā ḳhuun hotā hī rahā

jo hunar 'akbar' ne yaañ paidā kiyā

āsmān us ko Dubotā hī rahā

ek aalam us ko rota hi raha

'akbar' apni nind sota hi raha

main na samjha sard-o-garm-e-rozgar

umr bhar in ko samota hi raha

mere armanon ki kasrat dekhna

aasman ko uzr hota hi raha

nafa aur nuqsan-e-hasti kya bataun

is qadar paya ki khota hi raha

mere dil mein un ke mizhgan ka KHayal

ek barchhi si chubhota hi raha

hirs-e-jannat din-ba-din baDhti gai

muft zahid umr khota hi raha

hum umid-e-wasl par jite rahe

ahd pura un ka hota hi raha

kucha-e-saffak kab KHali raha

ek na ek ka KHun hota hi raha

jo hunar 'akbar' ne yan paida kiya

aasman us ko Dubota hi raha