ek dariya hai jis ki rawani tha main

ek dariyā hai jis kī ravānī thā maiñ

haañ kisī daur meñ bahtā paanī thā maiñ

apnī āzādiyoñ se jiyā maiñ sadā

go tumhārī tarah hī makānī thā maiñ

maiñ bhī apne liye kab haqīqat banā

dūsroñ ke liye to kahānī thā maiñ

ye jo zardī hai ab vasl kī den hai

mausam-e-hijr meñ rang dhānī thā maiñ

ḳhaak vaale mujhe dekhte hī na the

vo samajhte rahe āsmānī thā maiñ

is se pahle bhī do log hī the vahāñ

ek avval thā vo ek 'sānī' thā maiñ

ek dariya hai jis ki rawani tha main

han kisi daur mein bahta pani tha main

apni aazadiyon se jiya main sada

go tumhaari tarah hi makani tha main

main bhi apne liye kab haqiqat bana

dusron ke liye to kahani tha main

ye jo zardi hai ab wasl ki den hai

mausam-e-hijr mein rang dhani tha main

KHak wale mujhe dekhte hi na the

wo samajhte rahe aasmani tha main

is se pahle bhi do log hi the wahan

ek awwal tha wo ek 'sani' tha main